Жиззах вилоятида Иқтисодий жиноятларга қарши курашиш департаментининг Пахтакор туман бўлими катта тезкор вакилига нисбатан жиноят иши қўзғатилди. Бу ҳақда Давлат хавфсизлик хизмати хабар берди.
Маълум қилинишича, департамент ходими 1989 йилда туғилган, муқаддам судланган таниши билан тил бириктириб, техника таъминоти билан шуғулланувчи МЧЖ раҳбарининг ишончига кирган. Улар Жиззах шаҳар мактабгача ва мактаб таълими бўлими билан интерактив доскаларни харид қилиш бўйича электрон тендерда ғолиб чиқаришни ваъда қилган.
Бунинг эвазига тадбиркордан 85 млн сўм талаб қилинган. Тергов маълумотларига кўра, аслида 15,2 млн сўмлик интерактив доскаларни давлат муассасасига 25 млн сўмдан сотиш режалаштирилган.
ДХХ ва прокуратура ходимлари ҳамкорлигида ўтказилган тезкор тадбирда аввал 1989 йилда туғилган шахс 85 млн сўмни олган вақтида ушланган. Кейинчалик унинг 30 млн сўмини департамент ходими мактаб директори билан бирга олган пайтда ашёвий далиллар билан қўлга олинган.
Ҳолат юзасидан Жиззах вилояти прокуратураси томонидан Ўзбекистон Жиноят кодекси 168-моддаси билан жиноят иши қўзғатилиб, гумонланувчиларга нисбатан қамоқ эҳтиёт чораси қўлланди. Тергов ҳаракатлари давом этмоқда.
