Jizzax viloyatida Iqtisodiy jinoyatlarga qarshi kurashish departamentining Paxtakor tuman bo‘limi katta tezkor vakiliga nisbatan jinoyat ishi qo‘zg‘atildi. Bu haqda Davlat xavfsizlik xizmati xabar berdi.
Ma’lum qilinishicha, departament xodimi 1989 yilda tug‘ilgan, muqaddam sudlangan tanishi bilan til birliktirib, texnika ta’minoti bilan shug‘ullanuvchi MChJ rahbarining ishonchiga kirgan. Ular Jizzax shahar maktabgacha va maktab ta’limi bo‘limi bilan interaktiv doskalarni xarid qilish bo‘yicha elektron tenderda g‘olib chiqarishni va’da qilgan.
Buning evaziga tadbirkordan 85 mln so‘m talab qilingan. Tergov ma’lumotlariga ko‘ra, aslida 15,2 mln so‘mlik interaktiv doskalarni davlat muassasasiga 25 mln so‘mdan sotish rejalashtirilgan.
DXX va prokuratura xodimlari hamkorligida o‘tkazilgan tezkor tadbirda avval 1989 yilda tug‘ilgan shaxs 85 mln so‘mni olgan vaqtida ushlangan. Keyinchalik uning 30 mln so‘mini departament xodimi maktab direktori bilan birga olgan paytda ashyoviy dalillar bilan qo‘lga olingan.
Holat yuzasidan Jizzax viloyati prokuraturasi tomonidan O‘zbekiston Jinoyat kodeksi 168-moddasi bilan jinoyat ishi qo‘zg‘atilib, gumonlanuvchilarga nisbatan qamoq ehtiyot chorasi qo‘llandi. Tergov harakatlari davom etmoqda.
