Туркиянинг Истанбул вилоятида 2019 йилда йўқолган деб қидирувга берилган 36 ёшли Ҳуррият Турсунбоева эри томонидан ўлдирилгани аниқланди. Тергов маълумотларига кўра, гумонланувчи аёлни уйида жанжал пайтида ўлдирган. У жасадни бир муддат яшириб, кейинчалик бўлакларга бўлиб, чиқинди контейнерига ташлаган. Ҳолат юзасидан эркак ҳамда унга ёрдам бергани айтилган дўсти қўлга олинган.
Истанбул полицияси раҳбарияти топшириғи билан эски йўқолганлик ишлари қайта кўриб чиқилган. Қайта тергов жараёнида қўшнилар кўрсатмалари, телефон маълумотлари ва уйда ўтказилган текширувлар орқали жиноят излари аниқланган ва хонадонда қон излари топилган.
Гумонланувчи сўроқда жиноятни тан олиб, жасадни қандай йўқ қилганини айтган. У воқеадан сўнг бошқа шахс ҳужжатлари орқали яшириниб юргани ҳам маълум бўлди. Жорий йил март ойида эркак чегара орқали Туркияга кирган вақтида қўлга олинган. Ҳозирда ҳар икки гумонланувчи судга топширилган, тергов ҳаракатлари давом этмоқда.
Туркиядаги ўзбекистонлик аёллар билан боғлиқ жиноятлар
Аввалроқ, Туркиянинг Баликесир вилоятидан 46 ёшли Дилафрўз Чўлиеванинг жасади топилиб, Ўзбекистонга қайтарилганди. Мазкур жиноятни содир этишда гумонланиб 4 нафар шахс қўлга олинган бўлиб, ҳозирги вақтда тергов ҳаракатлари давом этмоқда.
Шунингдек, олдинроқ Туркиянинг Истанбул шаҳри Шишли туманида чиқинди йиғувчи томонидан ахлат контейнеридан ўзбекистонлик Дурдона Ҳакимованинг жасади топилган эди.
Кейинроқ мазкур иш доирасида у ўлдирилган Умрониядаги уйда яна бир ўзбекистонлик аёл – Сайёра Эргашалиева ҳам бўлаклаб ўлдирилгани аниқланди.
Бундан ташқари, Туркиянинг Истанбул шаҳрида ўзбекистонлик аёл озарбайжонлик шахс тарафидан жинсий зўравонликка учраганди.
Қайд этиш жоиз, сўнгги вақтларда Туркияда ўзбекистонлик аёллар билан боғлиқ қатор оғир жиноятлар кузатилмоқда.
