Уларнинг республикага қайтарилиши Европа мамлакатларида ўтказилган кенг қамровли тергов натижасида амалга оширилди.
II–III асрларга мансуб, Марказий Осиё ҳудудидан ноқонуний олиб чиқилган маданий қадриятлар Ўзбекистонга қайтарилди, деб хабар қилади “Дунё” ахборот агентлиги.
Маълум қилинишича, Буюк Британия пойтахти полициясининг санъат ва антиквариат соҳасидаги жиноятларга қарши кураш бўлими томонидан аниқланган артефактлар Ўзбекистон элчихонасига топширилган. Улар кейинчалик ватанга олиб келиниб, Тошкентда янги очилган Ислом цивилизацияси маркази экспозициясига қўйилади.
Лондон полицияси детективи Софи Хейзнинг таъкидлашича, топилган артефактлар нафақат Ўзбекистон, балки бутун инсоният меросига тегишлидир. Тергов миллий ва халқаро экспертлар, шунингдек, ЕХҲТ ҳамда WOSCU ташкилоти кўмагида олиб борилган.
