​Аёлга ўхшаб кийинган лўли йигит фирибгарлик йўли билан дўконни ўмарди

Россиянинг Кемерово вилоятида аёллар кийимини кийиб, фирибгарлик жиноятини содир этган лўли йигит қўлга олинди, деб хабар берди “Ntv.ru” нашри.

Лўли йигит қўлга олинганда ҳали “аёл образи”да эди.

Кемерово вилоят ИИВнинг берган маълумотига кўра, Полисаево шаҳридаги озиқ-овқат дўконларидан бирида сотувчи бўлиб ишловчи аёл полицияга ариза билан мурожаат этиб, кечқурун дўконга кирган лўли аёл уни алдаб, савдодан тушган пулларни ва катта миқдордаги озиқ-овқат маҳсулотларини фирибгарлик йўли билан олиб кетганлигини маълум қилди.

Дўкон ёпилишидан олдин, кечки пайт сотувчининг олдига лўли аёл келиб, ўзини Рита деб таништирган. У сотувчи аёлга савдо марказига кучли илму-амал қилинганини, агар хоҳласа унга ёрдам бериши мумкинлигини маълум қилган. Унинг гапларидан қўрқиб кетган сотувчи лўли аёлни илму-амалдан халос қилиши учун қўшни хонага бошлаган. Лўли аёл ўқиб қайтариб бериш шарти билан савдодан тушган пулларни беришни сўраган. Сотувчи савдодан тушган ҳамма пулларни ва миннатдорчилик сифатида катта миқдордаги озиқ-овқатларни унга бериб юборган. Лўли аёл бир неча кундан кейин пулларни ўқиб, қайтариб беришини айтиб, жуфтакни ростлаган. Эртаси куни ҳуши жойига келган сотувчи алданганини тушуниб, полицияга мурожаат қилган.

Полициячилар кузатув камерасининг видеоёзувларини кўриб, лўли аёл аслида 26 ёшли, аниқ яшаш жойига эга бўлмаган, илгари ҳам аёллар кийимида турли фирибгарлик жиноятларини амалга ошириб, қамалиб чиққан жиноятчи эканлигини аниқлади. Айни пайтда у “аёл образи”да қўлга олинди ва унга нисбатан жиноят иши қўзғатилди. У беш йилгача қамоқ жазосига ҳукм қилиниши мумкин.