​Дўстига буйрагини берган эркак ўзининг ҳам ҳаётини сақлаб қолди

Дон Герберт (Don Herbert) ва унинг рафиқаси Белинда автомобилда кетаётганда бозор ёнида тўхташга қарор қилишди. Ўша вақтда улар ўзларининг бу қарори Доннинг ва яна бир инсоннинг ҳаётини сақлаб қолишини хаёлларига ҳам келтиришмаган эди.

Бозорнинг ёнидаги черковдан мадҳия овози янгради. Қўшиқ айтиш жон-дили бўлган Дон черковнинг ёнидан беэътибор ўтиб кетолмади. У черковга кирди ва шу ерда Тим Жонс (Tim Jones) исмли йигит билан танишиб қолди. Улар бирпасда тил топишиб кетишди, аввал ҳаётда, кейин эса ижтимоий тармоқларда дўстлашишди.

Дон 12 йилдан бери жигар хасталигидан азият чекарди. У Тим билан танишганидан кейин 6 ой ўтгач, жигар кўчириб ўтказиш операциясини бошдан кечирди. Операция муваффақиятли ўтганига қарамай, Доннинг буйраклари ишламай қолди. Унга зудлик билан буйрак кўчириб ўтказиш зарур бўлди, аммо бу осон иш эмасди. Буйрак берадиган донор бўлмаганлиги туфайли Дон 5-6 йил навбат кутиши лозим эди. Доннинг рафиқаси Белинда турмуш ўртоғининг чекаётган азобини кўриб, чидаб туролмади ва Фейсбук ижтимоий тармоғи орқали одамлардан ёрдам сўради:

“Севган инсоним узоқ яшашини, у билан биргаликда кексайишни истайман”, деб ёзди. Белинданинг эри учун донор излаб ёзган номасига биринчилардан бўлиб, Тим жавоб берди. Унинг Дон билан танишганига атиги бир неча ҳафта ўтганига қарамай, аёлга қўнғироқ қилиб, қўлидан келгача ёрдам беришини маълум қилди. Орадан кўп ўтмай, Тим ҳеч иккиланмасдан Донга битта буйрагини бериш учун текширувлардан ўтди ва идеал даражадаги донор бўла олиши мумкинлиги аниқланди. Мўъжизани қарангки, бундай ҳолат 20.000 одамдан биттасига тўғри келар экан. Операция ҳеч қандай асоратларсиз ўтди, аммо операция жараёнида Тимда аневризм — томир деворларининг хавфли кенгайиши касаллиги борлиги, агар операция қилинмаганда у вафот этиши мумкинлиги, буни ўзи сезмаганлиги маълум бўлди. Бахтли тасодиф туфайли Тим омон қолди ва аневризм ҳеч қандай муаммосиз олиб ташланди. Шундай қилиб, дўстининг ҳаётини сақлаб қолмоқчи бўлган Тим англамаган ҳолда ўзининг ҳам ҳаётини сақлаб қолди.

Операциядан муваффақиятли чиққан дўстлар тезда оёққа туришди. Энди Тим билан Доннинг ҳаёти бир-бирига чамбарчас боғланди. Уларнинг оила аъзолари бу бахтли тасодифни Яратганнинг инояти, деб қабул қилишди.