“Евровидение” танловида Россиянинг шарафини ҳимоя қилиши кўзда тутилган хонанда Юлия Самойлова унинг Украинага кириши тақиқлангани ҳақидаги қарор бекор қилинишига умид қилмоқда, деб хабар берди Vesti.ru нашри.
“Бўлаётган воқеаларни ташқаридан кузатадиган бўлсак, жуда кулгили ҳолат юзага келди. Украина ҳукуматининг мендан айб қидираётганини ҳеч ҳам тушунмаяпман. Мендай кичкина қиз Украина давлатига қандай хавф-хатар туғдириши мумкин? Бундан кайфиятим тушгани йўқ. Тайёргарликдан тўхтамайман, вазият ўзгаришига умид қиламан”, деди хонанда Биринчи канал эфирида.
Эслатиб ўтамиз, Украина хавфсизлик хизмати Юлия Самойлованинг Украина республикасига киришини 3 йил муддатга тақиқлаган. Бунга унинг 2015 йилда Қримда бўлиб ўтган концертда ноқонуний равишда қатнашгани сабаб қилиб кўрсатилган. Хавфсизлик хизматининг маълумот беришича, хонанда Юлия Самойлова Украина Вазирлар маҳкамасининг қарорига мувофиқ, ярим оролга кириш учун махсус рухсатнома олиши шарт бўлган, аммо хонанда бу қарор талабларини бажармай, қонунбузарликка йўл қўйган.
Россия ташқи ишлар вазирлиги бу тақиқ билан Украина ҳукумати раҳбарияти ўзининг ожизлигини намойиш қилганини, Европа қадриятларини ҳурмат қилмаётганлигини таъкидлади. “Евровидение” қўшиқ танловининг ярим финали шу йилнинг 9-11 май кунлари Киев шаҳрида бўлиб ўтади. 13 май куни эса танловнинг финал қисми ўтказилиши кўзда тутилган. Россия ҳудудида мазкур танлов трансляция қилинмайди. Россиянинг йирик медиахолдинглари шу қарорга келди. Шунга қарамай, Россия шарафини Юлия Самойлова ҳимоя қилади.
