Индонезиялик фермерлар цемент заводи қурилишига қарши эканликларини оёқларини цементлаш орқали намойиш этишди, деб хабар берди Tjournal.ru нашри.
Жакарта шаҳрида бир неча кун давом этган норозилик намойишида элликка яқин фермер оёқларини цементлади. Улар ўзларининг мазкур ҳаракати орқали Марказий Ява вилоятида қурилиши режалаштирилган цемент заводининг барпо этилишидан норозиликларини билдиришди. Уларнинг фикрича, мазкур завод қурилиши сувни заҳарлаб, тоғли қишлоқ аҳолиси учун бир қанча муаммоларни юзага келтиради.
Завод эгасининг ишчи ўринлари яратиб бериш, ҳудуд иқтисодиётини кўтариш ҳақидаги ваъдалари ҳам уларни тўхтата олмади. Намойишнинг илк иштирокчилари март ойининг бошида оёғини цементлаган бўлса, аста-секинлик билан уларнинг сони ортиб бормоқда.
Март ойининг иккинчи ярмида норозилик намойишининг фаолларидан бири юрак хуружидан вафот этди. Унинг ўрнини исми-шарифи, туғилган санаси битилган тахтача эгаллади. Намойиш иштирокчилари эса уларни ҳаммаслакларининг ўлими ҳам тўхтата олмаслигини маълум қилди.
