Саратонга чалинган америкалик ёзувчи Эми Краузе Розенталь турмуш ўртоғи, ҳуқуқшунос Жейсон Розенталга бўлган чуқур муҳаббати ифодаланган эссе ёзди. Эссе эълон қилинганидан 10 кун ўтгач, Эми вафот этди, деб хабар беради “Cosmopolitan”.
Эми ва Жейсон 26 йил бирга яшади. Уларнинг икки нафар фарзандлари коллежда ўқийди ва алоҳида яшайди. Эр-хотин ҳаётини янгидан бошламоқчи, ўзлари учун яшамоқчи эди. Ўғил ва қизлари вояга етган ва эр-хотин кўпроқ вақтларини ўзларига сарфлаш, саёҳатга чиқишни режалаштирганди. Бироқ, 2015 йилда Эми қорин соҳасидаги кучли оғриқ туфайли шифохонага олиб келинди. Шифокорлар Эмига тухумдонлар саратони ташхисини қўйди.
Вақт ўтган сайин Эмининг саломатлиги ёмонлашиб борарди. 2017 йилда ўлими яқинлигини сезган Эми турмуш ўртоғи унинг ўлимидан сўнг яна бахтли турмуш қуриши учун унга атаб эссе ёзди. Аёл бу эссе орқали турмуш ўртоғига бошқа аёлларнинг эътиборини жалб қилишни истади.
Эмининг мактуби The New York Times газетаси сайтининг танишувлар рукнида чоп этилганидан сўнг уни 5 миллион киши ўқиди.
“Мен турмуш ўртоғимга бўлган муҳаббатимни акс эттирган ушбу мактубимни бир неча кундан бери ёзишга уринаман. Бироқ, морфий ва мазали таомларнинг етишмаслиги (Мен қарийб 5 ҳафтадан буён одамлардек овқатланмайман) мендан ёзувчилик маҳоратини ювиб чиқарди”,—деб бошланади Эмининг эссеси.
Матннинг кейинги ўринларида муаллифнинг турмуш ўртоғи билан бирга бошдан кечирган энг бахтиёр дамлари, хусусан уларнинг қандай танишгани, Эми биринчи бор ҳомиладор бўлганида биргаликда УЗД текширувига борганлари ҳамда турмуш ўртоғининг бошқа намунали хислатлари қайд этилган.
Эссе эълон қилингандан 10 кун ўтиб, Розенталь ҳаётдан кўз юмди.
