Буюк Британиялик коллекционер ўзи сотиб олган, собиқ шўро даврига тегишли Т-54 танки ёқилғи қуйиш бакидан олтин ёмби топди, деб хабар берди Mir24.tv нашри.
150 турдан ортиқ ҳарбий техникани коллекция қилган Ник Мид мазкур танкни 30 минг фунт стерлингга сотиб олган эди. Харидни амалга оширган коллекционер механик Тод Чемберлен билан бирга танк ичида ўқ-дори қолмаганлигига ишонч ҳосил қилиш мақсадида уни қисмларга ажратишди. Ёқилғи қуйиш бакининг қопқоғи очилганда, бакнинг ичидан қиймати икки миллион фунт стерлингга тенг бўлган бешта олтин ёмби топилди. Миднинг фикрича, олтин ёмбиларни 1990-1991 йиллардаги уруш пайтида Қувайтда талончилик билан шуғулланган Ироқ аскарлари яширган.
“Биз олтин ёмбиларни пулга алмаштиришимиз мумкин эмаслигини яхши тушунганимиз учун полицияга қўнғироқ қилдик”, деди Чемберлен. Ҳукумат коллекционерга тилхат ёзиб бериб, олтин ёмбиларни Лондонга олиб кетди. Коллекционер ҳар қандай шароитда ҳам танк унда қолиши ҳақида гапириб, ҳазил-мутойиба қилди.
