“Евровидение-2017” мусиқий танловида Россия иштирок этмайди. Бу ҳақдаги маълумот мусиқий танловнинг расмий сайтига жойлаштирилди.
Танлов мутасаддилари “Россиянинг мусиқий танловда иштирок этишини таъминлаши мумкин бўлган чораларни излашга урингани”ни алоҳида таъкидлаб ўтди.
Россия вакиласи Юлия Самойловага видеокўприк воситасида чиқиш қилишни таклиф қилишди. Бундан ташқари, ҳайъат аъзолари танловда бошқа россиялик хонанда иштирок этишини таклиф қилишган.
Маълумотда ёзилишича, ҳар икки таклиф ҳам Россиянинг Биринчи канали томонидан рад этилган.
Аввалроқ Биринчи канал Киев россиялик танлов иштирокчисини қабул қилишдан бош тортгани учун “Евровидение-2017”ни трансляция қилмаслигини билдирган эди.
Украина хавфсизлик хизмати Юлия Самойлова Қримда концерт бергани учун унга 3 йил муддатга мамлакат ҳудудига киришни тақиқлаб қўйди.
“Мен албатта хафа бўлдим. Ахир бу менинг орзуим эди! Мен сўнгги дақиқагача, бу масала ижобий ҳал бўлишига умид қилгандим, афсус бундай бўлмади”,—дейди Самойлова.
