Филиппиннинг шимолидаги тоғ йўлида йўловчи ташувчи автобуснинг пастга қулаши оқибатида 25 киши ҳалок бўлди, 22 киши яраланди, деб хабар берди Vesti.ru нашри.
Воқеа 18 апрель куни тонгда Нуэва-Эсиха вилоятининг Лусон оролида рўй берди. Автобус тормозининг ишламай қолиши оқибатида у 24 метр баландликдан пастга қулади.
Ҳукумат берган маълумотга кўра, автобуснинг томи очилиб кетиб, у бутунлай мажақланиб кетган. Автобуснинг зарб билан қулаши оқибатида барча йўловчилар транспорт воситасидан отилиб кетган.
Автобусда расман 45 та йўловчини ташиш кўзда тутилган бўлса-да, унда 60 та йўловчи бўлган. Жабрланганлар орасида ёш болалар ҳам бор, яраланганлар энг яқин аҳоли пунктидаги касалхонага ётқизилди.
