Пенсионер мазкур пул ўтказмасини жўнатиш учун 130 рубль сарфлади, деб хабар берди Tjournal.ru нашри.
Россиянинг Томск вилояти, Белый Яр қишлоғида яшовчи пенсионер Виктор Смирнягин пенсиясига қўшилган устамани Дмитрий Медведевга қайтариб жўнатди. У апрель ойида пенсиясига қўшилган 60 рублни “сариқ чақа”, деб атаб, бош вазир Дмитрий Медведевга юборди.
Смирнягиннинг айтишича, ҳукумат ўзининг бу ҳатти-ҳаракати билан пенсионерларнинг устидан очиқчасига кулмоқда. У вазир мамлакатда бўлаётган воқеаларни ўз кўзи билан кўриши, тушуниши учун пулни қайтариб жўнатган.
“Барча пенсионерларни почтага бориб, пенсияларига қўшилган устамани бош вазирга қайтариб жўнатишга чақираман! Қўшимча пулни қайтаринг! Балки шу сариқ чақани уларга жўнатсак, тинимсиз томоқ йиртишдан тўхташар! ”деди Виктор Смирнягин.
Пенсионер бир соат давомида мазкур пулни жўнатишга ҳаракат қилди, аммо почта ходимлари бундай кам пулни жўнатишдан бош тортишди, оқибатда у почта хизмати учун 130 рубль тўлашга мажбур бўлди.
2017 йилнинг 1 апрелидан бошлаб, Россияда пенсиялар 1,5 % га оширилди. Пенсия жамғармаси берган маълумотга кўра, ўртача суғурта пенсия миқдори 13 655 рублни, ижтимоий пенсия эса 8 742 рублни ташкил этади.
