Британиянинг Daily Star газетаси тўй саёҳати учун энг маъқул бўлган 14 мамлакатни санаб ўтди, деб хабар берди Lenta.ru нашри.
Мазкур рўйхатдан Тинч океанида жойлашган Француз Полинезиясидаги Бора-Бора ороли ҳам ўрин олди. Бу ердаги махсус уйчалар икки кишига мўлжалланган бўлиб, уларнинг ҳар бирида ётоқхона, ванна ва айвон мавжуд. Бино боғнинг ичида жойлашган бўлиб, унинг деразасидан чиройли табиат манзараси кўзга ташланади. Француз Полинезиясининг ёнида жойлашган Тетиароа оролида Пиппа Миддлтон (Кембриж герцогиняси Кэтриннинг опаси) ва унинг турмуш ўртоғи миллиардер Жеймс Мэттьюслар асал ойини ўтказишган.
Мазкур рўйхатга Мальдив оролидаги Coco Bodu Hithi курорти ҳам киритилган. Комплекс ҳудудида пляж, тўртта ресторан, иккита бар ва спа-марказ мавжуд. Coco Bodu Hithi курорти ва аэропорт орасидаги йўлни катерда 40 дақиқада босиб ўтиш мумкин. Рўйхатда Индонезиянинг Бали оролидаги Убуд шаҳрида жойлашган Viceroy Bali номли беш юлдузли меҳмонхона ҳам киритилган. Бу ердаги ҳар бир вилла бассейн, жакузи, ясси экранли телевизор ва iPod учун док-станциялар билан жиҳозланган.
Топ-14 га Таиланд, Камбожа, Греция, Сен-Люсия, Филиппин, Вьетнам, Ҳиндистон, Кения, Австралия, Фижи ва Италия мамлакатлари ҳам киритилди.
