Япониянинг икки мингга яқин полициячилари, ёнғин хавфсизлиги хизмати ходимлари ва ҳарбий аскарларидан иборат гуруҳи Япониянинг жануби-ғарбида кучли ёғингарчилик сабабли юзага келган сув тошқини пайтида йўқолган 22 кишини қидиришда давом этмоқда, деб хабар берди Ria.ru нашри.
Фукуока ва Оита префектураларида айни пайтда табиий офат туфайли 25 кишининг ҳалок бўлгани ва 22 кишининг бедарак йўқолгани расман тан олинди. Бедарак йўқолган одамларни қидириб топиш учун 2000 га яқин полициячилар, ўт ўчирувчилар ва ҳарбийлар жалб этилди. Улар занжир бўлиб, сув тошқини оқибатида вайрон бўлган, лой остида қолган уйларни текширувдан ўтказмоқда. Кюсю оролининг жануби-ғарбида ўтган ҳафтадан бери ёғингарчилик оқибатида бир неча маротаба кўчки ва сув тошқинлари кузатилди. Уйлар, йўллар, темирйўл кўприклари яроқсиз аҳволга келди. Бу ерда бир кунда ёққан ёмғир июль ойининг бир ойлик меъёридан ошиб кетди.
