"Ёшим 37 да. Тиббиёт коллежида таҳсил олишни истайман. Коллежларга тўлов асосида неча ёшгача қабул қилишади?"
Наргиза Равшанова, Сурхондарё вилояти, Жарқўрғон тумани
Фарҳод РИЗАЕВ, Ўрта махсус, касб-ҳунар таълими маркази директорининг биринчи ўринбосари:
— Ўрта махсус, касб-ҳунар таълими муассасаларида иккинчи ва ундан кейинги таълим олиш Ўзбекистон Республикаси Адлия вазирлиги томонидан 2008 йил 21 августда 1844-сон билан давлат рўйхатидан ўтказилган "Ўзбекистон Республикаси таълим муассасаларида иккинчи ва ундан кейинги таълимни олиш тартиби тўғрисида"ги низом асосида амалга оширилади. Мазкур Низомнинг 5-бандида иккинчи ва ундан кейинги олий (ўрта махсус, касб-ҳунар) маълумот олиш учун ҳужжатлар 20 июлдан 20 августгача қабул қилиниши кўрсатилган. Ўқиш муайян касб бўйича тўлов-шартномада кўрсатилган маблағни белгиланган тартибда тўлаган фуқаролар сони гуруҳ шакллантириш учун етарли бўлганда амалга оширилади.
Иккинчи ва ундан кейинги ўрта махсус таълим олиш учун фуқароларнинг ёши чегараланмаган.
