Ироқнинг Мосул шаҳрида “Ислом давлати” террорчилик гуруҳи таркибида жанг қилган чечен жангарисига турмушга чиққан немис қиз қўлга олинди, деб хабар берди Ria.ru нашри.
Нашрнинг хабар беришича, 16 ёшли Линде Венцель (Linda Wenzel) 20 нафар бошқа аёллар билан бирга Мосулнинг ер ости тунелларидан бирида қўлга олинди. Қиз тергов қилиш учун Боғдод шаҳрига юборилди. У билан учрашган Ироқ парламент аъзоси Виан Дакхилнинг сўзларига қараганда, қиз Германиядан Ироққа келиб, “Ислом давлати” террорчилик гуруҳининг чечен миллатига мансуб жангарисига турмушга чиққанлигини, қизнинг онаси Катарина ҳам туннелдан топилган немис қиз унинг қизи эканлигини тасдиқлаган.
“Ҳозирда қиз тергов қилинмоқда. Биз ҳукуматдан уни Германияга топширмасликни талаб қиламиз. У Ироққа террорчилар сафига қўшилиш учун келган, демак у Ироқ қонунчилиги бўйича жазоланиши шарт”, деди депутат нашрга берган интервьюсида.
Нашрнинг таъкидлашича, Мосул шаҳрида туннелдан топилган 20 нафар чет эллик аёлларнинг беш нафари Германия, икки нафари Канада, уч нафари Туркия, уч нафари Россия ва яна бири тўрт нафар фарзанди бўлган Франция фуқаролари бўлган.
Ироқ бош вазири Ҳайдар ал-Ободий ўтган ҳафтада уч йил давомида жангарилар назоратида бўлган Мосул шаҳрининг террорчилардан озод этилганлигини расман маълум қилган эди. Операцияга раҳбарлик қилган америкалик генерал Стивен Таусенд шаҳарни жангарилардан батамом тозалаш учун яна бир неча ҳафта зарурлигини билдирди. Чоршанба куни ал-Ободий Мосулни озод қилиш учун бўлган жанг ниҳоясига етганлигини маълум қилди.
