Ўттиз ёшли хитойлик сайёҳ аёл Таиланднинг Пхукет оролида денгиз тўлқини фонида фотосессия қилаётганда ҳалок бўлди, деб хабар берди Ria.ru нашри.
Фожиа Камала Бич пляжида рўй берди. Хитойлик сайёҳ аёл қояга чиқиб, денгизга орқа ўгирганча фотосессия қилган. Уни турмуш ўртоғи суратга олган. Бирдан аёлнинг ортида кўтарилган кучли тўлқин уни денгизга қаърига олиб кетган.
Аёлнинг турмуш ўртоғи ва бошқа сайёҳлар уни қутқаришга ҳаракат қилди, воқеа жойига қутқарувчилар етиб келди. Бироқ аёл сувдан олиб чиқилганда, оламдан ўтган эди.
Полициянинг маълумот беришича, аёл турмуш ўртоғи билан бирга фожиа юз берган жойдан узоқ бўлмаган “люкс” виллада яшаган.
Айни пайтда аксарият Пхукет пляжлари чўмилишни тақиқловчи қизил байроқчалар илинган. Мамлакатда май ойидан октябрь ойига қадар ёғингарчилик мавсуми давом этади. Бу пайтда Таиланднинг жанубий қисмидаги курортларда тез-тез довул кўтарилиб, денгиз тўлқини 2,5-3 метр баландликкача кўтарилади.
Сўнггги ойларда қизил байроқчаларга эътибор бермай, чўмилишда давом этган бир нечта маҳаллий ва хорижлик сайёҳлар ҳалок бўлди. Бундай пайтда нафақат денгизда чўмилиш, балки унга яқин келиш ҳам жуда хавфлидир.
