Жанубий Америкада қадимий инклар сулоласининг пойтахти бўлмиш Куско шаҳрини халқаро ЮНЕСКО рўйхатига киритилган Арекипа билан боғловчи Belmond Andean Explorer экспресс поезд ҳаракати йўлга қўйилди, деб хабар берди Prikolno.cc нашри.
Мазкур поезд нафақат ўз йўналиши, балки яратилган шарт-шароитлари билан ҳам бошқа поездлардан тубдан фарқ қилади. Поезднинг ичи нақ жаннатни эслатади.
Экспресс поезд Куско шаҳридан чиқиб, Анд тоғларидаги ўтлоқлардан ўтиб, саёҳатчиларни Титикака кўлига, Колка водийсига, кейин эса Арекипага олиб боради. Саёҳат уч кун-у, икки тун давом этади. Саёҳатчининг хоҳиш-истагига биноан худди шу йўналишда яна ортга қайтиш мумкин.
Поездда умумий ва плацкарт вагонлар йўқ, купелар турли кўринишга эга. Ҳар бир купе қимматбаҳо меҳмонхонадаги номерларни эслатади. Поездда бир ва икки ўринли “люкс” кабиналар мавжуд бўлиб, уларнинг барчасида алоҳида душ ва ҳожатхона мавжуд.
Belmond Andean Express поездининг иккита вагон-ресторани бор. Улар қимматбаҳо анжомлар билан жиҳозланган. У оддий умумий овқатланиш жойларидан ўзининг ҳашамати билан фарқ қилади.
Меҳмонларга Андда етиштирилган мавсумий мева-сабзавотлардан тайёрланган таомлар тақдим этилади. Меню Перунинг энг нуфузли меҳмонхоналари бош ошпазлари томонидан тузилган.
