Вақтини аямай жониворларга ёрдам қўлини чўзаётган инсонларга ҳам тасанно айтсанг, арзийди.
Танишинг, бу Патрик Килонзо Мвалуа. У мана бир йилдирки, Кения миллий паркидаги ҳайвонларни сувсизликдан қутқариб келмоқда.
Сув ташиш ғояси унда қурғоқчилик сабаб барча сув манбалари қуриб қолгандан кейин пайдо бўлди. Ўшанда Патрик миллий паркнинг турли жойларига сув элтиб бериш учун юк машинасини ижарага олди. У ҳар куни сув идишларини тўлдириш учун йўлга бир неча соат сарфлайди. Филлар, буйволлар, антилопалар ва зебралар таниш мотор овозини эшитишлари биланоқ югуриб келишади.
Бугун унинг асосий мақсади — кўпроқ ҳайвонларни суғориш учун сув ташувчи машиналар сонини кўпайтиришдир. Яқинда америкалик уч нафар аёл Патрикнинг лойиҳаси учун интернет орқали маблағ йиға бошлашди. Ҳозирча янги юк ташувчи машина сотиб олиш учун 18 000 доллар нақд. Қолаверса, бу кениялик қаҳрамонимиз “Цаво кўнгиллари” лойиҳасини ҳам бошқариб боради. Бунда Патрик мактабларга бориб, болаларга ёввойи табиатни асраш қанчалик аҳамиятли эканини сўзлаб беради.
