45 ёшли Скотт Нисон Голливуддаги йирик киностудиялардан бирининг раҳбари эди, деб ёзади Mix.tn.kz нашри.
Унинг ҳашаматли уйи, спорт автомобили ва машҳур дўстлари бор эди. Бироқ у шон-шуҳратнинг юқори чўққисига етганда, тўсатдан кинобизнесни тарк этиб, бор мол-мулкини сотди ва Камбожага кўчиб кетди. У ўзининг бу ҳатти-ҳаракатини бахт пулда эмаслигини англаб етганлиги билан изоҳлади.
Скотт Нисон мазкур мамлакатга саёҳатга келган эди. У қорин ғамида ахлатхоналарда тентираб юрган оч-наҳор болаларни кўриб, даҳшатга тушди. Шу куннинг ўзидаёқ Скотт уйсиз-жойсиз икки нафар болага ижарага уй олиб бериб, уларнинг тиббий даволаниши учун ёрдам берди.
“Камбожада етим болага ёрдам бериш учун бир ойга атиги 40 доллар сарфлаш лозим бўлади, – дейди Скотт Нисон. – Бу жуда катта маблағ эмаслигини кўриб, виждоним қийналди”. У мавжуд мол-мулкини сотса, 8 йил давомида 200 нафар болани боқа олиши мумкинлигини билди.
Скотт Нисон мақсади етим болаларга ғамхўрлик қилиш бўлган Cambodia Children’s Fund ташкилотига асос солди. У Камбожада истиқомат қилади. Шу йиллар мобайнида Скотт икки мингдан ортиқ камбағал етим болаларга кўмаклашди.
