Покистон полицияси сўнгги лаҳзаларда 50 ёшли эркак билан 10 ёшли келиннинг никоҳ маросимини тўхтатди, деб хабар берди Вести.ru нашри.
Маълум бўлишича, қизнинг ота-онаси 4500 доллар қарз эвазига 10 ёшли қизини 50 ёшли эркакка узатишга мажбур бўлган. Мазкур ноқонуний никоҳнинг ташкилотчилари бўлган 11 киши полиция томонидан қўлга олинди.
Ҳуқуқ-тартибот идораси ходимининг маълумот беришича, Синдх провинциясидаги шаҳарларидан бирининг полиция бўлимига 10 ёшли қизчанинг 50 ёшли Житмал Мехар билан никоҳланаётгани ҳақида хабар келиб тушган. Полициячилар маҳаллий совчи Муҳаммад Меҳарнинг уйини қуршовга олишди. Шу ерда куёвдан бошқа барча никоҳ маросимининг ташкилотчиларини қўлга олишди. Куёв эса бу пайтда жуфтакни ростлаган эди. Суруштирувлар натижасида қизнинг онаси эрини даволатиш учун бўлажак “куёви”дан қарз олган. Аммо вақт ўтишига қарамай, қарзини тўлай олмаган. Аввалига Житмал Мехар ундан уйини сотишни, кейин эса воситачи орқали қарз эвазига қизини беришни сўраган. Қизнинг онаси ҳам никоҳ маросимининг бошқа ташкилотчилари билан бирга суд олдида жавоб берадиган бўлди. Покистон қонунчилигига биноан ёш қизлар билан турмуш қурган одамга икки йилдан ортиқ қамоқ жазоси берилади.
