Британиялик полициячи ҳамкасбидан сўроқсиз равишда бир қути печеньесини еб қўйганлиги учун тергов қилинмоқда, деб хабар берди lenta.ru нашри.
Тергов берган маълумотга кўра, Лондон полицияси констебли Томас Хупер 2016 йилнинг май ойида ҳамкасбининг шкафидан бир қути печеньени олган. Бироқ кейин ширинликни еб қўйганини тан олмаган. “Бу ерда гап йўқолган нарсанинг қиммат-арзонлигида эмас, балки бировнинг хусусий мулкини ноқонуний равишда ўзлаштирганликда”, деди судда адвокат Чарльз Апторп.
Судда бу иш полициячига хос эмаслиги ҳақида сўз юритилди. Бундан ташқари Хупер хизмат машинасидан ноқонуний фойдаланиб, тезликни оширганликда ҳам айбланмоқда. Аммо Хупер мазкур айбларни тан олмади. Унинг сўзларига қараганда машинада руҳий носоғлом одамни олиб кетаётганлиги учун тезликни оширган.
Қораловчилар каттами-кичикми, ўғирлик бу ўғирлик, деган қарорга келди. Тергов ҳамон давом этмоқда. Ҳозирча полициячига нисбатан қандай чора кўрилгани ҳақида маълумот берилмаган.
