Шаффофлик ҳукумат ва аҳоли ўртасидаги ишончни мустаҳкамлайдиган омил. Айниқса, бугунги кунда барча соҳаларда очиқлик ва шаффофлик энг муҳим мезон ҳисобланади. Бу борада Президент матбуот хизматининг фаолияти, айниқса тизимли равишда брифинглар ўтказилаётгани таҳсинга лойиқ.
Шу жумладан, юртимизнинг кўплаб вазирлик ва ташкилотлари қошида ҳам медиа марказлар ташкил этилмоқда. Бу рўёбга чиқарилаётган ислоҳотларни тезкор ва батафсил ёритишга, мутасадди вазирлик ва идоралар зиммасига юклатилган вазифалар ва уларнинг бажарилиши тўғрисида оммавий ахборот воситалари вакилларига мунтазам равишда ҳисобот бериб боришда жуда қўл келади.
Сўнгги икки ой ичида Ўзбекистон Ёшлар иттифоқи раҳбари Қаҳрамон Қуранбаевнинг саҳифаси Президентимизнинг ижтимоий тармоқлардаги саҳифасидан кейин Ўзбекистонда иккинчи бўлиб верификация олгани, Ёшлар иттифоқи саҳифасида бир кунда 100 тага яқин пост қўйилаётгани, бу саҳифа унча-мунча ахборот агентликлари билан беллаша олаётгани ва асосийси, Ёшлар иттифоқи вакилларининг вилоятлардаги муаммоларни ёритаётгани, постларнинг аксарияти вилоятлардан йўлланаётгани ҳам фикримизга далил бўла олади. Айтиш жоизки, шундан сўнг интернетдаги ижтимоий тармоқларда Ёшлар иттифоқига танқидий муносабатлар сезиларли даражада камайди. Бунга балки ўз вақтида Ёшлар медиа марказининг ташкил этилгани сабабдир.
Айниқса “Ёш китобхон танлови”нинг ўтказилгани, “Диний маърифат тўгараклари”нинг очилиши кўпчиликнинг кўнглидан жой олиб, одамларнинг Ёшлар иттифоқига муносабатини ўзгартириб юборди дейиш мумкин.
Умумий гап бўлиб қолмаслиги учун ўзим гувоҳ бўлган бир воқеани баён этсам. Куни кеча Ёшлар медиа маркази томонидан Ёш журналистлар мактаби фаолиятини ташкил этиш мақсадида юртимиздаги икки олий ўқув юртининг журналистика факультети талабалари жалб этилиб, улар ўртасида кастинг ўтказилди.
Бундан мақсад бўлажак журналистларга амалиёт ўташ, устоз журналистларнинг маҳорат дарсларига қатнашиш имконини яратиш, ТВ ва радио бўйича журналистлар мактаби иштирокчиларини “Бунёдкор” ёшлар телеклуби базасида ўқитиш, хуллас, бир сўз билан айтганда ёш журналистлар дипломни қўлга киритгунига қадар шу жараёнда фаол иштирок этишлари учун имконият яратиш. Мен ҳам ушбу кастингда иштирок этдим.
Кастингда иштирок этиш учун йиғилган тенгдошларимнинг қувончи ичига сиғмай “Биз учун имкониятлар эшиги кенг очиляпти. Ҳам ўқиб, ҳам амалиёт ўташ орзумиз эди” дейишгани, кастингга чин дилдан тайёргарлик кўришганининг ўзида уларнинг Ёшлар иттифоқи фаолиятидан хурсанд эканликларини билиш мумкин. Аслида ушбу Ёш журналистлар мактаби биз ёшлар учун яна бир қатор имкониятларни режалаштирган экан, ташкилотчилар бу ҳақда вақти келганда алоҳида тўхталамиз дейишди.
Лекин интернетда кўпинча ўрта ёшлилар (эътибор беринг, ёшлар эмас!) томонидан Ёшлар иттифоқига нисбатан салбий фикр билдирадиганлар ҳамон учраб турибди. Нега?! Шу ҳақда мушоҳада қилиб кўрсак. Табиийки, киши ёши улғайгани сайин ўзидан кичикларга панд-насиҳат қилишни, қандай яшашни ўргатишни истаб бораверади. Аслида, бу фақат бизнинг халққа хос хислат эмас, ўз даврида Суқрот ҳам “Ҳозирги ёшлар бузилиб кетяпти” дея бонг урган.
Шундай экан, танқид қилаётганларни тўғри тушунамиз, улар биз ёшларнинг келажагимиз учун қайғуришяпти.
Лекин келинг, масалани бошқа томонини ҳам кўриб чиқайлик. Ахир ҳар бир киши ўзи фарзанди ёки ука-сингиллари бирор касб-ҳунарнинг бошини тутишини, тил ўрганиши, бирор фандан чуқурлаштирилган дарсларга қатнашини, спорт билан шуғулланишини истайди-ку, тўғрими? Бир пайтлар имом хатиблар диний таълим олишга қизиққан ёшларни бошини бирлаштириб ислом динининг моҳиятини тушунтириб бериши орзу эмасмиди?
Шундай экан, Ёшлар иттифоқининг ёшларнинг қизиқишидан келиб чиқиб ҳар бир йўналишда уларга йўл-йўриқ кўрсатаётгани, текин тўгараклар ташкил этилгани учун нега айримлар хурсанд бўлишмаяпти?
Нега шароит яратилаётганда эътироз билдиришяпти? Ёшларнинг фикрини чалғитишяпти. Нега ёшлар муаммолари давлат сиёсати даражасига кўтарилган бир пайтда, биз ёшларни Президентимизнинг шахсан ўзи қўллаб-қувватлаб турган бир паллада иттифоқнинг ҳар бир ишидан камчилик топишяпти?
Кузатувларим натижасида яна бир хулосага келдим. Кўпчиликнинг ғашига тегаётгани бу ёшлар иттифоқи иштирокчилари ўзининг ҳар бир бажарган ишини интерентдаги ижтимоий тармоқларга расм ва видео тарзида жойлаштираётгани экан. Узр-у, лекин тарғибот учун ҳам қилган иши ҳақида маълумот бериши керак-ку! Ахир ҳозир ҳар бир соҳада очиқлик анъанага айланмадими? Агар бажараётган иши ҳақида хабар бермаса, бошқа ёшлар қаердан билиб уларнинг сафига қўшилади?
Аслида эътирозларнинг борлигидан ҳам хафа эмасмиз. Нега дейсизми? Чунки бу бизда жамоатчилик фикри шаклланаётганидан далолат. Биз ёшлар эса жамиятимизда рўй бераётган ҳар қандай яхши ўзгаришдан қувонамиз. Тараққиёт ва фаровон ҳаёт сари интилаётган эканмиз, ҳар бир идораю, ташкилотдан шаффофлик талаб қилишимиз шарт.
Албатта, Ёшлар иттифоқи фаолиятида камчиликлар йўқ демоқчи эмасмиз. Лекин энди тетапоя бўлаётган (ташкил этилганига бир йил бўлди) ташкилотга танқид тошларини отавериш ҳам тўғри эмас. Ундан кўра ёшларни илмли, ҳунарли қилиш йўлида бирлашиб, ўзингизда бор таклифларни ўртага ташлаб, Ёшлар иттифоқига кўмак берганингиз яхши эмасми? Ахир ёшлар иттифоқидагилар ўзингизнинг фарзандингиз, ука-сингилларингиз-ку.
Барчамиз аждодларимиз билан ҳақли равишда фахланамиз, лекин энди бизнинг замонамизда ҳам уларга муносиб авлодлар етишиб чиқишига ўз ҳиссамизни қўшишимиз керак.
Кўриб турганингиздек, Ёшлар иттифоқи томонидан олиб борилаётган кенг қамровли ишлар фақатгина ёшларни тўғри тарбиялашга, уларни касб-ҳунарга йўналтиришга, илм-маърифатли қилишга қаратилган. Давлатимизнинг бугунги кун сиёсати ҳам шуни тақоза этмоқда. Шундай экан келинг, фарзандларингиз, ука-сингилларингизга бу йўлда биргаликда ёрдам беринг...
Гуласал Қодирова, талаба.
