Жорий йилнинг 20 март куни Ўзбекистон ёшлар иттифоқи ҳамда Ўзбекистон енгил атлетика федерацияси ҳамкорлигида “Наврўз” умумхалқ байрами муносабати билан барча ҳудудларнинг марказий кўчаларида “Наврўз — 2018 марафони” бўлиб ўтади.
Мазкур спорт байрами маҳаллалардаги уюшмаган ёшлар, таълим муассасаларида таҳсил олаётган 16 ёшдан 30 ёшгача бўлган йигит-қизлар ҳамда кўнгиллилар ўртасида енгил атлетика спорт турининг югуриш қоидаларига мувофиқ ўтказилади.
2018 метр, 3 км, 21 км масофаларда ўтказилиши режалаштирилган марафон соат 8.00 дан барча ҳудудларнинг марказий кўчаларида старт олади.
Ташкилотчилар маълумот беришича, 21 километрга биринчи келган 10 нафар, 3 километрга биринчи келган 3 нафар ҳамда 2018 метрга биринчи келган яна 3 нафар иштирокчи велосипед мукофоти билан тақдирланади.
Қолган қатнашчиларга диплом, медал, фахрий ёрлиқ ва байрам совғалари улашиши режалаштирилган.
Эслатиб ўтамиз, 20 март куни Тошкент шаҳрида 8:00 дан 12:00 га қадар Нукус кўчаси (Нукус, А.Қодирий, Абай, А.Навоий, Ш.Рашидов, Мустақиллик кўчалари)дан “Пахтакор” марказий стадионигача бўлган кўчалар (Глинка, Ойбек, А.Темур, Мустақиллик, Ш.Рашидов, Абай, Себзор, Навоий, Юсуф Хос Хожиб кўчалари)да ҳаракатланиш чекланади.
