Жума куни Кубада ҳалокатга учраган Boeing 737 самолётига эгалик қилувчи Damojh авиакомпаниясининг фаолиятига чек қўйилмоқда. ТАССнинг хабар беришича, бу Мексика фуқаро авиацияси Бош бошқармаси баёнотида қайд этилган.
"18 май куни содир бўлган фожеа сабабли "Damojh" ҳаво йўлларида режадан ташқари жиддий текширувлар ўтказилади”, дейилади ҳужжатда. – Бу вақтда у ўз фаолиятини тўхтатиб туриши ҳақида огоҳлантирилди".
Damojh компанияси Global Air номи билан ҳам танилган бўлиб, бир ойча аввал лайнерни экипажи билан бирга Cubana de Aviacion компаниясига ижарага берган эди. Ҳалокатдан олдин самолёт сўнгги маротаба 2017 йилнинг ноябрида текширувдан ўтган бўлиб, ўшанда бир йиллик кафолат берилган.
Эслатиб ўтамиз, Boeing 737-200 самолёти 18 май куни Гавана – Ольгин йўналиши бўйича парвозни амалга ошираётиб, ҳалокатга учраган. Икки қора қутидан бири топилган бўлсада, самолёт ҳалокатига нима сабаб бўлгани ханузгача эълон қилинмаган.
Самолётда экипаж билан бирга 113 киши бор эди, уларнинг 110 нафари воқеа жойида ҳалок бўлди, 3 киши жиддий жароҳат билан шифохонага ётқизилган.
Сўнгги маълумотларга қараганда, фожеада омон қолган уч аёлдан бири шифохонада олган жароҳатлари туфайли вафот этди. Шу тариқа, авиаҳалокат қурбонларининг умумий сони 111 кишига етган. Авиаҳалокатда омон қолган яна икки аёлнинг аҳволи ўта оғир экани айтилмоқда.
Ўз.А
