Гватемалада Фуэго вулқони ҳаракатга келди, дея хабар бермоқда Сегодня нашри.
Табиий офат натижасида жароҳат олганлар ва қурбонлар бор.
Вулқоннинг фаоллашиши туфайли кўплаб талофатлар бор. Мазкур ҳодиса оқибатида 25 киши ҳалок бўлди.
Бундан ташқари, юзлаб одамлар жароҳат олган. Улар орасида болалар ҳам борлиги маълум қилинмоқда. Ҳукумат бир нечта аҳоли пунктларида хавфнинг энг юқори – қизил даражасини эълон қилди. Ҳозирга келиб, 3 мингдан кўпроқ одам эвакуация қилинган.
– Биз фалокатга яқин ҳудудда эдик. Фавқулодда ҳолат эълон қилингач, тўс-тўполон бошланди. Шундан сўнг мен бир неча яқинларимни йўқотиб қўйдим. Ҳозирча улар ҳалок бўлганми ёки йўқми, билмайман, – деди жабрдийдалардан бири.
Вулқон тобора фаоллашиб бораётгани сабабли пойтахтдаги “Аврора” халқаро аэропорти ёпиб қўйилди. Бу сўнгги 300 йил ичидаги Фуэго вулқоннинг энг кучли отилиши сифатида баҳоланмоқда. Ундан чиқаётган қайноқ лава 8 км. масофагача етган. Лава оқими маҳаллий аҳоли пунктларигача етиб келди. Шунингдек, бу ерда йўлларнинг ёрилганини кўриш мумкин. Бундан ташқари, ундан кўтарилаётган қора тутун табиатга ва инсонлар саломатлигига хавфли экани аниқланган.
