Жорий йили иккита лайнерини йўқотган Malaysia Airlines авиакомпанияни қайта структуризация қилиш режаси доирасида 6 минг нафар ходимини ишдан бўшатади. Бу ҳақда AP агентлиги хабар бермоқда.
Ишчиларни бўшатишдан ташқари, жума куни компания раҳбариятинининг ўзгариши ҳақида ҳам расмий баёнот берилиши кутилмоқда.
Аввалроқ, Малайзия бош вазири Нажиб Раззоқ миллий авиакомпаниянинг қиммат баҳо қоғозларини биржалардан олиб чиқиш тадбирлари бошлангани ҳақида маълум қилган.
Пайшанба куни Malaysia Airlines авиакомпаниясининг йилнинг иккинчи чораги учун молиявий ҳисоботи пайдо бўлди. Ҳужжатларга кўра, жорий йилнинг апрель ойидан июнь ойигача компаниянинг зарари 92 миллион АҚШ долларини ташкил этган. Сўнгги уч йил ичида эса компания 1,3 миллиард АҚШ доллари миқдорида зарар кўрган.
Эслатиб ўтамиз, 8 март куни Малайзия авиакомпаниясига қарашли бўлган самолёт парвозга чиққанидан икки соат ўтгач, сирли тарзда ғойиб бўлган. Лайнер бортида 227 нафар йўловчи ҳамда 12 экипаж аъзоси бўлган.
Амстердам-Куала-Лумпур рейси бўйича учган Malaysia Airlines авиакомпаниясининг Boeing 777 самолёти эса 17 июль куни Украинанинг Донецк вилоятида қулаган. Лайнер бортида бўлган барча 298 киши ҳалок бўлган.
