Угандада бундан 3 ой аввал туғилган болакайни илк бор қўлига олган доялар ҳайратдан нима қилишларини билмай қолишди. У 4 қўл ва 4 оёқ билан дунё келганди. Дастлаб Угандадаги шифокорлар болакайнинг ота-онасига уни тузатишнинг бирор чораси йўқ эканини айтишди.
Гўдакнинг саломатлигидан ваҳимага тушган ота-онаси уни пойтахт Кампала шаҳридаги шифохонага олиб боришди. Ўтган 3 ой давомида унинг “ортиқча” аъзоларини олиб ташлаш борасида бош қотиришди.
18 август куни шифокорлар Поло Макис деб исм берилган болакайнинг танасидаги эгизак укасининг ўсмай қолган ва туташган икки қўл ва икки оёғини олиб ташлашга муваффақ бўлишди, дея ёзади lifenews.ru нашри.
3 соат давом этган жарроҳлик амалиётидан сўнг Поло ўзини яхши ҳис қилаяпти. Айтиш лозимки, Полонинг 4 қўл ва 4 оёқ билан туғилганидан ташқари унинг танасида яна бир қанча кишини ҳайратга соладиган жиҳатлар ҳам бор. Масалан, унинг юраги ўнгда, жигари эса чапда жойлашган. Болакай ҳақидаги маълумотлар унинг аҳволи бирмунча яхшилангандан сўнг, бугун омма эътиборига ҳавола этилди.
