Ўзбекистон кинематографчилари шу йил 21-30 сентябрь кунлари Россиянинг Анапа шаҳрида бўлиб ўтадиган “Киношок” XXIII очиқ кинофестивалида иштирок этадилар.
Кинофорум доирасида тўртта танлов бўлиб ўтиши кутилмоқда. Асосий танлов дастуридан Мансур Васатийнинг “Қудуқ” фильми (Ўзбекистон) ўрин олган. “ТВ-шок” танловида “Ўзбекфильм” студиясида режиссёр Жавоҳир Қосимов томонидан суратга олинган “Зиёда” картинаси тақдим этилган, дея хабар беради Uz24.uz нашри.
«КиноМалыШок» фестивалида эса Рашид Маликовнинг “Тоға” фильми қатнашади. Айтиш лозимки, ушбу картина Иркутскда бўлиб ўтган “Оила даврасида” халқаро театр ва кино фестивалининг бош совринига сазовор бўлган эди.
Эслатиб ўтамиз, ушбу “Киношок” XXIII очиқ кинофестивали Анапа шаҳрида 1992 йилдан буён ўтказиб келинади. Фестиваль тадбирлари кенг кўламлиги ва очиқлиги билан фарқ қилади. Улар нафақат танлов намойишларидан, балки танловдан ташқари очиқ майдончалардаги актёрлар билан учрашувлар, кино санъати арбоблари билан ўтказиладиган ижодий кечалар, гала-концертлар ва бошқалардан иборат.
