Таиланднинг Пхукет шаҳрида бир аёл суперелим туфайли киприкларидан айрилди, дея ёзмоқда Lenta.ru нашри.
35 ёшли Беньяпа Супап (Benyapa Supap) киприкларини ўстириш учун гўзаллик салонига борган. Косметолог эса махсус косметик елим ўрнига тез қурийдиган универсал елимдан фойдаланган.
Бир неча дақиқадан сўнг аёлнинг қовоқлари шишиб кетган, кўзларини пирпиратмоқчи бўлганида киприклар бир-бирига ёпишиб қолган. Шунга қарамай, косметолог Супапдан хизмат ҳақи учун 1,5 минг бат талаб қилган.
Елимдан ҳалос бўлиш учун Супап бошқа салонга борган. Бир соат давом этган уринишлардан сўнг елим билан бирга аёл киприкларидан ҳам бутунлай айрилган. Устига устак, яна минг бат тўлашга мажбур бўлган.
Аёл полицияга мурожаат этиб, бор гапни айтган бўлса-да, полиция ходимлари ҳеч қандай ёрдам беролмасликларини билдиришган.
