Греция полицияси тирик ҳолатда кўмилган аёлнинг ўлими юзасидан тергов ишларини олиб бормоқда. Ушбу аёл 28 сентябрь куни маҳаллий қабристонларнинг бирига англашилмовчилик туфайли тирик ҳолда кўмилган. www.ntv.ru нашри бу ҳақда маълумот беради.
Бироқ дафн маросими ўтгач, қабр остидан аёл кишининг ёрдам беришларини сўраб, йиғлаб дод солган товуши эшитилган. Айни дамда қабристон вакиллари тергов қилинмоқда. Улар дафн маросими ўтгач қабр остидан бир соат давомида аёл кишининг тинимсиз йиғлаган овозини эшитганликлари ҳақида айтишган. Орадан икки соат ўтиб қабр очилганда аёл аллақачон жон таслим қилиб бўлганди. Аёлга тиббий ёрдам кўрсатиш учун келган шифокор унинг ҳаво етишмаслиги оқибатида вафот этганини айтган.
Аниқланишича, 49 ёшли ушбу аёл саратон касаллигига чалинган ва касаллик оқибатида летаргик уйқуга кетган. Шифокорлар эса уни вафот этган деб ўйлашган. Буни қарангки, дафн маросимидан сўнг у ўзига келган.
Аёл яна қайтадан дафн этилди. Маълумотларга кўра, унинг икки нафар фарзанди бор эди.
