Индонезияда юз берган зилзилалар ва ундан кейин юзага келган цунами сабабли қурбон бўлганлар сони 1,2 мингдан ортди.
Маълумотларга кўра, 16,7 минг киши зилзила сабабли ўз уйларини тарк этган. 2,4 миллион киши эса инсонпарварлик ёрдамига муҳтож.
Якшанба куни Индонезия президенти Жоко Видодо талафот кўрган ҳудудларга имкон даражасида ёрдам берилишини айтиб, ўз халқини бирдамликка чақирган. Унинг кўрсатмасига биноан одамларни қидирув-қутқарув ишларига армия ҳам жалб қилинди.
Эслатиб ўтамиз, Индонезиянинг Сулавеси оролида жума куни 6,1 ва 7.4 балли зилзилалар содир бўлди ва ундан кейин бир нечта афтершоклар қайд этилган. Бунинг оқибатида Палу шаҳрига баландлиги 2 метргача етувчи цунами ёпирилди.
Ҳозирда жаҳон мамлакатлари Индонезияга ўз кўмагини юборишни бошлашган. Жумладан, Жанубий Корея инсонпарварлик ёрдами сифатида 1 миллион АҚШ доллари, Европа Иттифоқи эса 1,5 миллион евро миқдорида маблағ ажратишини маълум қилган.
