Калифорния Соғлиқни Сақлаш Департаменти ушбу штат аҳолисига ёнғин оқибатида ҳаво ифлослангани туфайли респираторлардан фойдаланишни тавсия қилди.
Сан-Франциско Фавқулодда вазиятлар бошқармасининг шанба куни берган хабарига қараганда, шаҳарда “бинафшаранг” огоҳлантириш яъни атроф-муҳитга оид олтита огоҳлантиришларнинг энг сўнгги даражаси эълон қилинган.
“Сан-Франциско шаҳридаги ҳаво сифати “бинафшаранг” даражада бўлиб, аҳолининг барча гуруҳлари саломатлиги учун хавф туғдиради. Биноларни тарк этмаслик, дераза ва эшикларни ёпиқ ҳолатда сақлаш мақсадга мувофиқ", - деб ёзилган муассасанинг Твиттердаги саҳифасида. Шу каби ҳолат Сакраменто, Окланд ва Чико шаҳарлари марказида ҳам кузатилди.
Жума куни Калифорния шимолидаги Бьютт округида юз берган йирик ёнғин қурбонлари сони 63 дан 71 кишига етгани маълум қилинганди. Шундай қилиб, штатда содир бўлган ёнғинларда ҳалок бўлганлар сони жами 74 кишини ташкил этмоқда. Бедарак йўқолган кишилар сони эса 630 кишидан минг нафарга кўпайди.
Аввалроқ, штатнинг шимолий қисмида содир бўлган ва Калифорния тарихида энг ҳалокатли деб топилган ёнғиннинг майдони 566 квадрат кмдан ортиқ бўлганлиги хабар қилинган эди. 11,8 мингдан зиёд бино, жумладан, 9,7 мингта уй-жой вайронага айланган. Ҳозиргача ёнғиннинг 40 фоизини бартараф этишга эришилган.
