Йил бошидан эҳтиётсизлик туфайли ёнғин келиб чиқиш натижасида 3 нафар шахс ўз хонадонида вафот этди. Бу ҳақда Ўзбекистон Республикаси ИИВ Жамоатчилик ва оммавий воситалари билан алоқалар бошқармаси хабар берди.
Қайд этилишича, 1 январь куни Бухоро вилоятининг Ғиждувон туманида яшаган Р.Р. уйида сигарета чекиб ухлаб қолиши оқибатида сигарет кукуни кўрпа устига тушиб, ёнғин содир бўлган.
Кўрилган чоралар натижасида ёнғин ўчирилган. Ёнғин оқибатида уйининг 40 кв.м. майдонида том қисми ва уй жиҳозлари ёниб зарар кўрган ҳамда Р.Р.нинг куйган ҳолдаги жасади топилган.
Тошкент вилоятининг Ўртачирчиқ туманида шу йилнинг 2 январь куни Туркистон маҳалласида яшаган Н.М.нинг уйида ёнғин содир бўлган.
Ёнғин оқибатида уйининг 1 кв.м. майдонида пол қисми ва гилами ёниб зарар кўрган ҳамда Н.М.нинг куйган ҳолдаги жасади топилган. Ёнғин Н.М. маст ҳолда уйида сигарет чекиб, ухлаб қолиши оқибатида келиб чиққанлиги аниқланган.
Шу йилнинг 4 январь куни Тошкент вилоятининг Қуйичирчиқ туманида яшаган Б.Ш.нинг уйида ёнғин содир бўлган. Кўрилган чоралар натижасида ёнғин ўчирилган. Оқибатда уйнинг 140 кв.м. майдонида томи, шифти, жихозлари ёниб зарар кўрган ва ёнғин ўчириш вақтида Б.Ш.нинг куйган ҳолдаги жасади топилган.
Ёнғинларнинг келиб чиқиш сабаби аниқланмоқда.
