Пойтахтимизда ““Doing business” рейтингида Ўзбекистон позициясини яхшилаш: эришилган натижалар ва устувор йўналишлар” мавзусидаги давра суҳбати бўлиб ўтмоқда. Кун тартибида — Ўзбекистон бизнес-муҳитини яхшилаш ва тадбиркорликка янада кенг эркинликлар бериш учун амалга оширилаётган ислоҳотларни кенг жамоатчиликка етказиш.
Умуман олганда, ушбу рейтинг 10 та кўрсатгич бўйича баҳоланади. Улардан энг биринчи ва асосий этиб ҳисобланадигани — бизнесни рўйхатдан ўтказиш кўрсатгичи.
Тадбиркорлик дунёсига илк қадам Давлат хизматлари марказларидан бошланади — айнан бу ерда бизнесни рўйхатдан ўтказиш жараёни амалга оширилади. Шунинг учун, ушбу кўрсатгич бўйича позицияни яхшилаш Адлия вазирлигига юклатилган.
Тадбиркорликни рўйхатдан ўтказиш индикатори бўйича давлат хизматлари соҳасида амалга оширилган ишлар ҳақида Давлат хизматлари агентлиги директори Ҳ. Турахужаев сўзлаб берди.
— Бугун махсус автоматик тизим ишга туширилгани боис Давлат хизматлари марказларида бизнесни рўйхатдан ўтказишга 15-20 минут вақт кетади. Бундан ташқари, ушбу жараённи масофадан туриб, “онлайн” амалга ошириш имкони мавжуд. Фуқаролар кўпроқ электрон давлат хизматларидан фойдаланишлари учун эса, тадбиркорликни “онлайн” тарзда рўйхатдан ўтказганда давлат божини бор йўғи ярми тўланади, — дея иштирокчилар эътиборини тортди Ҳ. Турахужаев.
Таъкидланганидек, бугунги кунда Ўзбекистонда бизнес юритишни соддалаштириш учун бир қанча ишлар амалга оширилмоқда. Мисол учун, тадбиркорликни давлат рўйхатидан ўтказгандан сўнг, Давлат хизматлари марказининг ўзида бир неча дақиқада банқ ҳисобрақамини очиш мумкин.
Таққослайдиган бўлсак, илгари ушбу жараён 1 иш кунини талаб этарди. Банк ҳисобрақамини очиш учун тижорат банкининг филиалларидан бирига мурожаат қилиш ва тегишли аризадан тортиб директор ва бухгалтерни тайинлаш тўғрисидаги қарорга қадар бир қатор ҳужжатлар тақдим этиш керак эди. Ушбу ҳужжатлар тақдим этилгандан сўнггина банк билан икки томонлама шартнома имзоланарди.
Давлат хизматлари агентлиги томонидан ушбу жараён анча соддалаштирилди. Ҳозирда банк ҳисобрақамини тадбиркорлик субъектини рўйхатдан ўтказиш жараёнида очиш имкони мавжуд.
Мурожаатчи сўровномани тўлдиради ва давлат рўйхатидан ўтказиш жараёнининг ўзида исталган тижорат банк филиалини танлайди. Умуман олганда, рўйхатдан ўтказиш билан биргаликда ушбу жараён 30 минутдан кўп бўлмаган вақтни талаб этади.
Мазкур хизмат жорий йилнинг март ойида ишга туширилган. Ушбу қисқа фурсатда банк ҳисобрақамини давлат рўйхатидан ўтказиш жараёнида очиш учун 1 512 та ариза келиб тушди. Улардан 394 таси электрон тарзда fo.birdarcha.uz портали орқали келиб тушди.
изнес юритишда юзага келадиган бюрократик тўсиқлардан воз кечиш учун ҳам катта ишлар олиб борилди. Масалан, 2019 йил 1 мартдан бошлаб тадбиркорлик субъектларидан ҳужжатларда муҳр босишни ёки ҳужжатларни муҳр билан тасдиқлаш тартиби бекор қилинди.
Келгусида тадбиркорлик сўбъектларининг рўйхатдан ўтказилган мажбуриятлар ҳақидаги, таъқиқ ёки бошқа чекловлар мавжудлиги ҳақидаги маълумотлар, кўчар мулкуа бўлган лизинг мажбуриятлари my.gov.uz порталида мавжуд бўлади. Бугунги кунда Давлат хизматлари агентлиги томонидан ушбу вазифаларни тезкор амалга ошириш учун зарур жараёнлар бошлаб юборилди.
Такидлаш жоизки, Агентлик жамоаси саъй-ҳаракатлари натижасида юридик шахсларнинг устав фонди миқдори бўйича мажбурий талаблар бекор қилинди. Бу, эндиликда устав фонди миқдори фақатгина лицензия талаблари билан чекланиши мумкин эканлигини англатади.
Юқорида Ўзбекистаонда тадбиркорликни ривожлантириш учун амалга оширилган энг муҳим ишлар келтирилган. Албатта, Давлат хизматлари агентлиги ушбу йўналишдаги ишларини давом эттиради. Биз бизнесни бошлаш ва юритиш учун максимал қулай муҳитини яратишга ҳаракат қиламиз.
