Эстрадамизнинг энг ёрқин ва мафтункор хонандаларидан бири Райҳоннинг мухлислари концерт дастурларини соғинишгани аниқ. Кутилмаган сюрпризларга бой катта шоу-дастурлари билан ҳар йили февраль ойида мухлисларини ҳушнуд этишга одатланган Райҳон бу йил оналик бахтига мушарраф бўлгани сабаб концерт намойиш этмаганди, деб ёзмоқда popcorn.uz.
Аммо келаси йил албатта янги дастурини тақдим этишини ваъда қилган ва унинг асл мухлислари ўша кунни интиқлик билан кутишмоқда.
Буни ҳис қилган Райҳон 2015 йили 23, 24, 25, 26 февраль кунлари бўлиб ўтиши режалаштирилган дастур учун тайёргарликларни бошлаганига анча бўлди.
Айтганча, Райҳон ижодида яқин кунларда яна бир катта янгилик, янги дуэт кутилмоқда. Айнан қайси санъаткор билан дуэт ижро этганини сир сақлаётган Райҳон бу янги ижод маҳсули барчага манзур бўлишига ишончи комил.
Айни кунларда радиотўлқинлар орқали янграётган “Излама” таронаси учун тасвирга олинган видеоклипнинг монтаж жараёнлари кетмоқда. Доим профессионал тарзда яратилган клиплари билан томошабинларга завқ улашадиган хонанда бу сафар ҳам мухлисларини лол қолдирса ажабмас.
