Республика Киночилар уйида “Ўзбеккино” миллий агентлиги буюртмасига кўра суратга олинган “Зумраша” болалар юмористик киножурнали янги қисмларининг оммавий ахборот воситалари вакиллари учун намойиши ҳамда киноижодкорлар иштирокида матбуот анжумани бўлиб ўтди, дея хабар қилмоқда ЎзА.
Унда “Ўзбеккино” миллий агентлиги бош директори Ж.Қосимов ва бошқалар Президентимиз Ислом Каримов раҳнамолигида навқирон авлод маънавиятини юксалтириш, ўғил-қизларга пухта билим бериш, уларни ҳар жиҳатдан етук шахслар этиб вояга етказиш йўлида доимий эътибор ва ғамхўрлик кўрсатилаётганини таъкидлади.
“Соғлом бола йили” Давлат дастури доирасида “Ўзбеккино” миллий агентлиги томонидан болаликнинг завқли онлари акс эттирилган бир қатор бадиий, анимацион фильмлар яратилиб, томошабинларга тақдим этилди. Айни пайтда мамлакатимизда ёш авлод камолоти йўлидаги меҳр ва ғамхўрлик акс эттирилган янги ҳужжатли фильмлар суратга олинди.
2014 йилда “Зумраша” болалар ҳажвий киножурналининг 12 тўплами тасвирга олингани бу борадаги ишларнинг яна бир ёрқин намунасидир. Шу мақсадда агентлик қошида тажрибали адиблар, режиссёрлардан иборат ижодий гуруҳ тузилиб, киножурналга мўлжалланган ихчам сюжетлар учун танлов эълон қилинди. Унда кўплаб таниқли ижодкорлар фаол қатнашди. Тақдим этилган 300 дан ортиқ сценарийдан энг саралари танлаб олинди.
Киножурналнинг навбатдаги тўпламлари “5-студия” ёшлар тажриба-ижодий уюшмаси, “Қорақалпоқфильм” киностудияси, Ўзбекистон илмий- оммабоп ва ҳужжатли фильмлар киностудияси, “Санъат-маъно” студиясида тасвирга олинган.
Киножурнални яратиш жараёнида йигирмага яқин ёш киноижодкор фаол қатнашди.
Ёш киномухлисларга тақдим этилган тўпламларда катталарга ҳурмат, меҳнатсеварлик, билим олишга иштиёқ, тўғрисўзлик, ҳалоллик каби эзгу фазилатлар акс эттирилган. Айни пайтда ушбу экран асари ўғил-қизларни турли компьютер ўйинларига ҳаддан зиёд берилиб кетиш, вақтни беҳуда сарфлаш, дангасалик каби иллатлардан доимо огоҳ бўлишга чорлайди.
«Зумраша» киножурналининг янги тўпламлари мактаб ўқувчиларининг қишки таътил кунлари Алишер Навоий номидаги Кино саройида бепул намойиш этилиши кўзда тутилган.
24.12.2014 08:53
