Тайван шимоли-шарқида жойлашган Илан уездида аркали кўприк қулаб тушди. Оқибатда 5 нафар инсон ҳалок бўлди. Бу ҳақда Еuronews.com нашри хабар берди.
Маълумотларга кўра, ҳодиса рўй берган вақтда кўприкдан бензин ташувчи юк машинаси ўтаётган бўлган ва у ҳам кўприк билан бирга пристан устига қулаб, ёниб кетган. Шунингдек, иншоот остида балиқчилар қайиқлари бўлган ва кўплаб одамлар сувга тушиб кетган. Бундан 20 йил аввал қурилган 140 метр узунликдаги кўприкнинг айнан нима сабабдан қулаб тушгани ҳозирча номаълум. Баъзи тахминларга кўра, яқинда орол орқали ўтган тўфон 1999 йилда қурилган кўприкни заифлаштирган бўлиши мумкин.
