Маълумки, 6 ноябр куни хоразмлик фаол журналист Давлатназар Рўзметов автоҳалокат сабаб вафот этган эди. Ушбу воқе ортидан ҳодиса кутилмаган ҳалокат бўлмаслиги мумкин, деган тахминлар ҳам пайдо бўлганди. Ундан бир муддат аввал эса блогер Нафосат Оллошукурова билан боғлиқ вазиятлар бўйича ҳам турли миш-мишлар тарқалган, яъни уни мажбуран ушлаб турилаётгани билдирилган. Айрим блогер ва ижтимоий тармоқ фойдаланувчилари Ўзбекистон Президенти Администрацияси ҳузуридаги Ахборот ва оммавий коммуникациялар агентлиги директори Комил Алламжоновдан бу иш бўйича муносабат ва кўмак ҳам сўрашган. Бугун Агентлик раҳбари ушбу сўровларга жавоб қайтарди:
«Нафосат Оллошукурова ҳамда Давлатназар Рўзметов билан боғлиқ ҳолатга нега жимсиз, нима учун муносабат билдирмаяпсиз, демак бу ерда бир гап бор», деган танқидий фикрлар менга нисбатан кўп билдирилди. Айрим блогерларимиз воқеа ва ҳолатни аниқ билмасдан туриб, дарҳол «ана бошланди, танқид қилган журналистни энди шундай тақдир кутади», деган ноўрин гапларни ҳам айтишди.
Мана, ўрганишлар ниҳоясига етиб, бугун Агентлигимизга ушбу ҳолатга ойдинлик киритиши мумкин бўлган барча мутасадди раҳбарларни тўпладик. Ҳар бир келган масъул ўз йўналишида ҳолатга ойдинлик киритиб берди. Марҳум Давлатназар Рўзметовнинг автоҳалокати чизмаларда ва видеокамералардан олинган фотолар билан тушунтириб берилган бўлса, Оллашукурова масаласида унинг аниқ диагнози ва ҳолати ҳақида далилий фикрлар билдирилди.
Марҳум журналистнинг оиласига, албатта, Агентлик томонидан ёрдам кўрсатилади. Оллашукуровага эса тезроқ соғайиб, оиласи бағрига қайтишини тилаб қоламиз.
Барча журналист ва блогерларни эса бирор бир масалани оммага кўтариб чиқаётганда, шошқолоқлик қилмасдан, ҳиссиётларга берилмасдан, жиддий суриштирув ва фактларга асосланиб, холис материал беришга чақираман.
Фурсатдан фойдаланиб шуни айтмоқчиманки, агарда Агентлик қайсидир воқеа юзасидан баёнот бермаган ёки сукут сақлаган бўлса, бу — ушбу ҳолатни назардан четда қолдирди, дегани эмас. Соҳага тааллуқли барча ҳолатлар эътиборимизда ва уларнинг барчаси ўрганиб чиқилмоқда. Қонун доирасида фаолият кўрсатган барча журналист ва блогер бевосита Агентликнинг ҳимоясида ва ҳамиша шундай бўлиб қолади".
