Агар тоғда қиялик шунчалик кескин бўлганидан, унда оддий кўприк қуришнинг иложи бўлмаса, қандай қилиб кўприк қуриш мумкин? Бундай ҳолатда сиртмоқ кўприк қуринг, агар биттаси камлик қилса, иккинчисини қуринг. Япониялик муҳандислар Кавацу-Нанадару кўпригини қуришда айнан шундай йўл тутишди.
Икки сиртмоқдан иборат ушбу япон кўприги Япониянинг Кавацу шаҳрида жойлашган. Кўприкнинг иккита сиртмоқдан иборат спирал шакли автомобилларга 45 метр баландликка чиқиб-тушиш имкониятини беради. Бу сиртмоқ кўприк худди йўл четидаги тоғлар орасига осиб қўйилганга ўхшайди. Кўприк диаметри 80 м. ни, узунлиги эса 1,1 км. ни ташкил қилади. Бу кўприк Токио ва Ицу яриморолини боғлаб турувчи 414-шосседа 1982 йилда қурилган ҳамда диққатга сазовор жойга айланган. (xabardor.uz)