Ўтган ойда Россия Президенти Владимир Путин онлайн энциклопедия ҳисобланувчи “Википедиa”ни ишончсиз деб атаган ва унинг ўрнини босадиган бошқа онлайн энциклопедия яратиш кераклигини таклиф қилганди. Бу ҳақда reuters.comга таяниб хабар берилди.
«Бу, замонавий шаклда тақдим этиладиган ишончли маълумотлар базаси бўлади», деб айтган Россия Президенти.
Эндиликда Россия ўзининг миллий энциклопедияси учун янги веб-сайт яратмоқчи. Ҳукумат қарорида айтилишича, бу орқали одамлар «илмий тасдиқланган билим манбалари асосида доимий равишда янгиланиб турадиган ишончли маълумотларни» топишлари мумкин бўлади.
2015 йилда Россия гиёҳванд моддалар билан боғлиқ сайтларни таъқиқловчи қонунчиликка биноан “Википедиа”нинг рус тилидаги версиясини блоклаган эди. Чунки унда наша ўсимлиги тўғрисидаги маълумотлар мавжуд бўлган.
21 ноябрь куни ТАСС ахборот агентлиги тарқатган хабарга кўра, янги русча портал учун 2 миллиард рубль (31 миллион доллар) миқдорида маблағ сарфланади. Шунингдек, ҳукумат қарорида қайд этилишича, “Буюк Россия Энциклопедияси” учун миллий илмий-тадқиқот маркази ҳам ташкил қилинади.
