Ер юзидаги энг қиммат фаввора Дубайда жойлашган бўлиб, у 218 млн. АҚШ долларига баҳоланган (800 000 000 дирхам). “Гиннесснинг рекордлар китоби”га кирган Dubai Fountainнинг баландлиги 275 м, майдони эса 3 та стандарт футбол майдони билан баробар.
Қурилиш 2009 йилда якунланган бўлиб, лойиҳалаш ишлари билан Американинг WET компанияси шуғулланган. Dubai Fountain дунёдаги энг баланд минора — Бурж Халифа олдида жойлашган, унинг суви 310 м баландликкача кўтарилади, фавворада 6600 ёриткич ҳамда 25 та рангли прожектор мавжуд.
Ҳар сонияда Dubai Fountain ҳавога 83 тонна сув олиб чиқади, компьютер дастурлари ёрдамида эса 1000 та фигура ва кўринишни акс эттириш мумкин.
Энг катта ва қимматбаҳо фаввора яна бир рекордни забт этди – у коинотдан туриб кўриш мумкин бўлган Осиёнинг энг ёруғ нуқтаси деб тан олинди. Намойишлар чоғида ёруғ томоша 32 км. узоқликдан кўринади.
