Оммавий ахборот воситаларида Тошкентда икки йил йил илгари бунёдкорлик ишлари муносабати билан бузилган “Киночилар уйи”нинг қайта тикланиши ҳақида хабарлар тарқатилган эди. “Ўзбеккино” Миллий агентлиги матбуот хизмати хизмати бу масалага аниқлик киритди.
“Киночилар уйи” “Ўзбекфильм” киностудияси ёнидаги “Замин” ресторани негизида тикланади. Реконструкциялаш ишларидан сўнг, ушбу масканда кинотеатр, томошалар ва тантаналар заллари барпо этилади. Шунингдек, бу ерда турли семинар машғулотлари ўтказиш имконияти ҳам юзага келади.
Айнан ушбу иншоот танланганига сабаб унинг “Ўзбеккино” маъмурий биноси ва “Ўзбекфильм” киностудияси суратга олиш майдончаси яқининида жойлашганидир. Истиқболдаги режаларга биноан, “Киночилар уйи” ягона туристик кино шаҳарчаси мажмуаси таркибига киради.
11 гектар майдонни эгаллайдиган кино шаҳарчасида Кинематография институти, “Тарихий Ўзбекистон” кинодекорацияси, Хива, Самарқанд, Бухоро сингари қадимий шаҳарлар павильонлари, “Ўзбекфильм”нинг ишлаб чиқариш студиялари ўрин олади. Реконструкциялаш ишлари учун ҳукуматимиз томонидан 40 млрд сўм миқдорида маблағ ажратилади.
Тўрт гектар майдонда россиялик таниқли кинопродюсер Сергей Сельянов томонидант суратга олинадиган “Кичкина Мук” эртак-фильми учун махсус декорациялар қурилади.
Шунингдек, кино шаҳарчаси ҳудудида кино усталари учун янги турар-жой мажмуаси қуриш ҳам кўзда тутилган.
