Ижтимоий тармоқларда фуқаро Сабоҳат Муқимованинг “Ўғлимни ўлдирганлар кўпчилик бўлса-да, лекин бир кишининг бўйнига қўйишмоқчи” сарлавҳа остида аудиоёзуви чоп этилган.
Мазкур аудиоёзувда арз қилган С.Муқимова 30 яшар ўғли Ж.Х.ни бир неча шахс ваҳшийларча ўлдиргани, битта гумонланувчи Россияга қочириб юборилгани, унинг паспорти олиб қўйилмагани, қон таҳлилида бошқа одамнинг қони чиққани, тергов нотўғри қилингани, экспертиза хулосасига кўра қон таҳлилида унинг ўғлиникидан ташқари яна уч кишининг қони борлиги, улар орасида ўғлини уйидан олиб чиқиб кетган боланинг қони йўқлиги, бу бола воситачи бўлиб, ўғлини ўлдирганлар бошқа эканлигини билдирган.
2019 йил 27 сентябрь куни соат 18:00 ларда Яккабоғ тумани, “Алақарға” қишлоғида жойлашган “Бахтиёров Шамшод Шерзод ўғли” хусусий корхонасига қарашли ошхона рўпарасида Ж.Х. бош қисмининг энса соҳасида ўткир санчиб кирувчи жисм билан етказилган тан жароҳати билан ҳушсиз ҳолатда топилган.
Мазкур ҳолат юзасидан 27.09.2019 йилда ЖКнинг 25,97-моддаси 1-қисми билан жиноят иши қўзғатилган.
Ж.Х. кўрсатилган тиббий муолажаларга қарамасдан, 2019 йил 29 сентябрда шифохонада вафот этган.
Судга оид тиббий экспертизанинг хулосасида Ж.Х.нинг ўлими “орттирилган калла миянинг очиқ шикастланиб, бош миянинг оғир даражали лат ейиши, бош мия тўқимасига ва мия қоринчаларига қон қуйилиши, ўнг чакка пешона суякларининг ботиб синиши” каби жароҳатларнинг кечиши жараёнида ривожланган ўткир юрак қон-томир етишмовчилигидан келиб чиққанлиги кўрсатилган.
Тўпланган тергов ҳужжатларига кўра, ушбу жиноятни олдиндан бўлган келишмовчилик туфайли Ш.С. содир этганлиги аниқланган.
Тергов натижасига кўра, Ш.С.га ЖКнинг 97-моддаси 1-қисми билан айблов эълон қилиниб (қамоқ эҳтиёт чораси қўлланган), жиноят иши 2019 йил 31 декабрь куни айблов хулосаси билан ЖИБ Чироқчи тумани судига юборилган.
Жиноят иши ҳозир судда кўрилмоқда, дея "darakchi.uz"га маълум қилди Бош прокуратура Матбуот хизмати.
