Тошкент шаҳри, Юнусобод туманида ўтказилган тўй маросимида 12 киши коронавирусга чалинган, дея хабар бермоқда Соғлиқни сақлаш вазирлиги.
Маълум бўлишича, 19 июнь, жума куни ушбу туманда яшовчи фуқаро икки нафар фарзандини тўрт кун ичида кетма-кет ўтказган никоҳ тўйи сабаб ҳам келин, ҳам 12 нафар маросим иштирокчиси ушбу инфекцияга чалинади. Айни пайтда кўплаб одамлар ушбу инфекцияни юқтириб олганликда гумон қилиниб, таҳлил натижаларини кутмоқда.
Ҳозирда бўлиб ўтган тадбирларда иштирок этган ва улар билан мулоқотда бўлган барча фуқаролар, ўнлаб оила аъзолари “Covid-19” га таҳлил олиниб, стационар ва уй карантинида тиббий кузатувга олинди. Эпидемиологик суриштирув ишлари давом этмоқда.
Аввалроқ пойтахтимизда нишонланган туғилган кун 13 нафар кишини коронавирусга чалинишига сабаб бўлганлиги ва кўплаб фуқаролар карантинга олинганлиги ҳақида хабар берилганди.
Вазирлик зарурат бўлмаганда оммавий ва оилавий тадбирлар ўтказишдан ҳамда унда иштирок этишдан вақтинчалик тийилиб туриш кераклигини эслатиб ўтади.
