Vazirlar Mahkamasining «Kamoliddin Behzod nomidagi davlat stipendiyasini ta`sis etish to`g`risida»gi qarori loyihasi muhokamasi yakunlandi.
Qaror bilan Kamoliddin Behzod nomidagi davlat stipendiyasini tayinlash tartibi to`g`risida Nizom tasdiqlanadi.
Nizomga ko`ra, Kamoliddin Behzod nomidagi davlat stipendiyasi O`zbekiston Respublikasi davlat oliy ta`lim muassasalarining tasviriy san`at, amaliy san`at, dizayn, san`atshunoslik hamda muzeyshunoslik yo`nalishlarining oxirgi ikki kursida ta`lim olayotgan bakalavriat bosqichi talabalariga tayinlanadi.
Davlat stipendiyasi kvotasi quyidagi ta`lim yo`nalishlarining har biri bo`yicha bittadan alohida-alohida taqsimlanadi:
- rangtasvir (turlari bo`yicha);
- grafika va miniatyura;
- haykaltaroshlik (turlari bo`yicha);
- amaliy san`at (turlari bo`yicha)
- dizayn (turlari bo`yicha);
- san`atshunoslik va muzeyshunoslik (turlari bo`yicha).
Davlat stipendiyasiga sazovor bo`lgan talabalar bakalavriat bosqichni tugatganidan so`ng bir yil mobaynida tegishli mutaxassislik bo`yicha magistraturaga kirish imtihonlarisiz, grant asosida qabul kvotasi doirasida qabul qilinadi.
Eslatib o`tamiz, 2020/2021 o`quv yilidan boshlab oliy ta`lim muassasalarida tasviriy va amaliy san`at hamda dizayn yo`nalishida ta`lim olayotgan talabalar uchun Kamoliddin Behzod nomidagi davlat stipendiyasi ta`sis etilishi Prezidentning 21 aprel kuni imzolagan qarorda belgilangan edi.
Joriy yil oktyabr oyida buyuk musavvir tavalludining 565 yilligi keng nishonlanadi.
