Ijtimoiy tarmoqlarda “Koronavirusga chalinish holatlari yashirilyaptimi?” degan sarlavhali xabar e`lon qilingan. Unda Qashqadaryo viloyati Shahrisabz shahrida kuniga 10 dan ortiq koronavirus holati qayd etilayotgani, lekin negadir statistikada kam ko`rsatilayotganligi aytilgan.
Qashqadaryo viloyati sog`liqni saqlash boshqarmasi ma`lum qilishicha, Shahrisabz shahrida aniqlangan koronavirusga chalingan bemorlar haqidagi statistik ma`lumotlar boshqa hududlar singari tegishli shtablar orqali jamlanib, Sog`liqni saqlash vazirligiga etkazilmoqda. Bu borada raqamlarni kamaytirib ko`rsatish holatiga yo`l qo`yilmagan.
"Prezidentimiz kecha o`tkazilgan videoselektor yig`ilishida haqiqiy holat bo`yicha raqamlarni yashirishga mutlaqo yo`l qo`ymaslik to`g`risida barcha rahbarlarni ogohlantirdi. Tizimda mazkur jarayonga mas`ul mutasaddilarga bu borada zarur tushunchalar etkazildi.
Shu o`rinda fuqarolarning shaxsiy ma`lumotlarini ularning ruxsatisiz tarqatish qonunga zid ekanligini yana bir karra eslatib o`tamiz", deyiladi SSB munosabatida.
