Taniqli jurnalist va tarixchi yozuvchi, ko`plab yoshlarning mehribon ustozi, mehnat faxriysi Mo`min Azizov 78 yoshida vafot etdi. Bu haqda Shahrisabz shahar hokimligi Matbuot xizmati rasmiy telegram kanalida xabar qilindi.
Halol mehnati bilan el–yurtga tanilgan, qalam ahli orasida haqiqat darakchisi nomini olgan jurnalist va tarixchi Mo`min Azizov 78 yoshida bandalikni bajo keltirdi. Mo`min aka 1942 yilning 2 martida Yakkabog` tumanida tavallud topdi. 1949-1959 yillar sobiq Dehlaviy nomli hozirgi 4-sonli maktabni a`lo baholarda tugatib, hujjatlarini sirtdan hozirgi O`zMUning jurnalistika fakultetiga topshirdi. Sirtdan o`qish bilan birga viloyatdagi “Qashqadaryo haqiqati” ro`znomasida faoliyat olib bordi. U kishining jurnalistikadagi keyingi faoliyati o`zi uchun qadrdon “Shahrisabz tongi” hozirgi “Kesh” tahririyati bilan bog`liq. Ushbu gazetaga muharrir o`rinbosari bo`lgan yillari siyosiy-ijtimoiy mavzularda ko`proq qalam tebratdi. Gazetachilikda 15 yil davomida to`plagan tajriba rahmatli Mo`min Azizovning keyingi mas`ul vazifalardagi faoliyatida asqotdi. 1981 yili may oyidan 1996 yil martigacha u kishi firqa, hokimiyat, xalq nazorati organlarida turli lavozimlarda samarali ishladi.
Mo`min Azizov usha og`ir, qaltis yillarda ham jurnalistga xos odilona ish tutishga intildi. Nafaqaga chiqqanlariga qadar olti yil konserva hissadorlik jamiyatida kasaba uyushma qo`mitasini boshqardi. Bu vazifada ham u kishi doimo adolat, butun jamoaning manfaati nuqtai nazaridan kelib chiqib ish ko`rdi. Fidoyi va zahmatkash ijodkor qaerda mehnat qilmasin sevgan kasbi jurnalistika bilan aloqani uzmadi 1995 yildan u kishi O`zbekiston “Adolat” sosial demokratik partiyasi tuman kengashining birinchi kotibi lavozimida ham faoliyat olib borib partiya dasturini keng targ`ib etishda bor bilim va mahoratini ishga soldi. Umrlarining so`nggi kuniga qadar o`z kasbiga sodiq qoldi. U kishi ijod qilishdan aslo charchamadi. Qadimiy va hamisha navqiron Shahrisabz shahrining o`tmishi, ajdodlarimiz xotirasi, ular qoldirgan ma`naviy merosni yoshlarga etkazish maqsadida “Keshning mashhur siymolari”, “Buyuklik yo`li”, “Qashqa osmonida qo`sh yulduz”, ”Olamshumul siymo”, tarixiy asarlarini yaratdi. Respublikamiz, viloyat, tuman ro`znomalarida u kishining qator turkum maqolalari chop etildi. Mehnat faxriysi ko`krak nishoni, yilning eng faol jurnalisti, qator tanlovlar g`olibi, o`tkir qalam sohibi iqtidorli jurnalist kamtarin ustoz Mo`min Azizovning yorqin xotirasi shahrisabzliklar qalbida mangu yashaydi.
Marhumning oila a`zolari, yaqinlariga chuqur hamdardlik bildiramiz.
