Marg`ilon shahar musiqali maqom teatrining oliy toifali drama artisti Kimsanboy Sobirov vafot etdi. Bu haqda Madaniyat vazirligi ma`lum qildi.
Yusufjon qiziq Shakarjonov nomidagi Farg`ona viloyat musiqali drama teatrida Sharof Boshbekov asari asosida sahnalashtirilgan «Temir xotin» spektakli xalqimizning sevimli sahna asariga aylangandi. Bugun ham uni barcha sevib tomosha qiladi.
Farg`onada teatr san`ati muxlislari haligacha «Temir xotin»da bosh rolni o`ynagan O`zbekiston xalq artisti Muhammadsoli Yusupovga «Qo`chqor aka», Olim rolidagi Kimsanboy Sobirovga «Olimtoy» deya murojaat qilishlari bejiz emas.
Ijodiy faoliyati davomida o`nlab rollarni maromiga etkazib ijro etgan Kimsanboy Sobirov mamlakatimiz mustaqilligining 29 yilligi arfasida Prezidentimiz Farmoniga ko`ra «Do`stlik» ordeni bilan taqdirlandi. Afsuski, bir umr muxlislari ardog`ida «Olimtoy» bo`lib yashagan taniqli aktyor 65 yoshida vafot etdi.
O`zbekiston Respublikasi Madaniyat vazirligi marhumning oila-a`zolariga chuqur ta`ziya izhor qiladi.
Biz ham tahririyatimiz nomidan marhumning yaqinlariga hamdardlik bildiramiz.
